Упис на директни инвестиции на резиденти во странство

Под упис на нова инвестиција се подразбира настанување на инвестиција со вложувања на резидентите во странство, или пак на нерезиденти во домашни субјекти. Вложувањата кои подразбираат намалување или зголемување на веќе постоечка инвестиција НЕ се впишуваат како нови инвестиции, туку како промени на веќе постоечката инвестиција. За таков случај прегледајте ја услугата „Промени и бришење на директна инвестиција“.

Одредена инвестиција може да подразбира и потреба од два или повеќе уписи од различен вид (упис на нова инвестиција или промена на постоечка инвестиција) доколку дел од веќе регистрирана инвестиција се пренесе на нов инвеститор.

Уписот може да се изврши електронски преку интернет, или пак директно во соодветните канцеларии на ЦРРСМ.

Директна инвестиција е вид на капитална трансакција во вид на:

• Вложувања на резиденти (правно или физичко лице) во странство, или
• Вложувања на нерезиденти (правно или физичко лице) во РС Македонија.

Директните инвестиции се вложувања со кои инвеститорот има намера да воспостави трајна економска поврзаност и/или да оствари право на управување со трговското друштво или другото правно лице во кое инвестира.

Видот на настанување и начинот на реализирање на директна инвестиција може да биде во:

• Пари, права, предмет, и тоа како:
  • Основање на трговско друштво во целосна сопственост на инвеститорот;
  • Зголемување на главнината на друштвото во целосна сопственост;
  • Стекнување на трговско друштво во целосна сопственост;
  • Учество во постојано друштво или здобивање со повеќе од 10% од основниот капитал на друштвото односно со повеќе од 10% од правото на одлучување.
• Заеми
  • Долгорочен заем со период од пет и повеќе години, кога се работи за заем од инвеститорот и кој е наменет за трговско друштво во негова целосна сопственост;
  • Долгорочен заем со период од пет и повеќе години, кога се работи за заем наменет за воспоставување на трајна економска поврзаност меѓу економски поврзани субјекти.
• Подружници, односно Основање подружница од страна на домашен субјект во странство.